Nadassanena pahātabbahetukaṁ nakusalaṁ dhammaṁ paccayā nevadassanena nabhāvanāya pahātabbahetuko kusalo dhammo uppajjati hetupaccayā. (Saṅkhittaṁ.) Hetuyā tīṇi …pe… avigate tīṇi.

Nadassanena pahātabbahetukaṁ naakusalaṁ dhammaṁ paccayā dassanena pahātabbahetuko akusalo dhammo uppajjati hetupaccayā. (Saṅkhittaṁ.) Hetuyā cha, ārammaṇe nava, adhipatiyā cha …pe… avigate nava.

Nanevadassanena nabhāvanāya pahātabbahetukaṁ naabyākataṁ dhammaṁ paṭicca nevadassanena nabhāvanāya pahātabbahetuko abyākato dhammo uppajjati hetupaccayā. (Saṅkhittaṁ.) Hetuyā cha, adhipatiyā cha …pe… avigate cha.